Տևողությունը՝ 2026 թ․ հուլիս – նոյեմբեր
Աշխարհագրական ընդգրկումը՝ Աշտարակ համայնք
Մասնակիցները՝ Աշտարակ համայնքի 30 երիտասարդ

Ծրագրի մասին

«Աշտարակի երիտասարդ դեսպաններ» ծրագիրը երիտասարդական մասնակցության և առաջնորդության զարգացման նախաձեռնություն է, որի նպատակն է համախմբել Աշտարակ համայնքի ակտիվ երիտասարդներին և ձևավորել շարունակական համագործակցության ցանց։

Ծրագիրը նախատեսված է 30 երիտասարդի համար և համատեղում է կարողությունների զարգացումը, փորձի փոխանակումը, կամավորական ներգրավվածությունը և համայնքի երիտասարդներին վերաբերող հարցերի շուրջ քննարկումները։ Նախաձեռնությունը չի սահմանափակվում միայն վերապատրաստմամբ․ այն ստեղծում է երկարաժամկետ հարթակ, որի միջոցով մասնակիցները կարող են կապ պահպանել, համագործակցել, տեղեկանալ նոր հնարավորությունների մասին և ներգրավվել տարբեր ծրագրերում ու միջոցառումներում։

Նպատակը և խնդիրները

Ծրագրի ընդհանուր նպատակն է խթանել Աշտարակ համայնքի երիտասարդների ակտիվ մասնակցությունը համայնքային կյանքին և նպաստել նախաձեռնող, պատասխանատու ու համագործակցող երիտասարդների շարունակական ցանցի ձևավորմանը։

Ծրագրի հիմնական խնդիրներն են՝

• զարգացնել մասնակիցների առաջնորդության, հաղորդակցության, թիմային աշխատանքի և հանրային ներկայացման հմտությունները,

• բարձրացնել երիտասարդների իրազեկվածությունը համայնքային և երիտասարդական մասնակցության հնարավորությունների վերաբերյալ,

• խթանել կամավորությունը, փոխօգնությունը և համայնքային ներգրավվածությունը,

• ձևավորել Աշտարակի երիտասարդ դեսպանների շարունակական ցանց,

• ստեղծել երիտասարդների հանդիպումների, քննարկումների և փորձի փոխանակման հարթակ,

• ներգրավել մասնակիցներին կազմակերպությունների և գործընկեր կառույցների ծրագրերում, միջոցառումներում ու կամավորական աշխատանքներում,

• աջակցել երիտասարդների գաղափարների զարգացմանը՝ տրամադրելով խորհրդատվական, մենթորական և կազմակերպչական աջակցություն,

• խթանել երիտասարդների ու համայնքային կառույցների միջև երկխոսությունը։

Հիմնական գործողությունները

Ծրագրի առաջին փուլը եռօրյա ինտենսիվ վերապատրաստումն է, որը կանցկացվի 2026 թվականի օգոստոսի 1–3-ը։

Վերապատրաստման ընթացքում մասնակիցները գործնական և ինտերակտիվ մեթոդներով կանդրադառնան հետևյալ թեմաներին՝ ինքնաճանաչում և անձնական զարգացում, առաջնորդություն և պատասխանատվություն, թիմային աշխատանք, արդյունավետ հաղորդակցություն, կամավորություն և համայնքային մասնակցություն, երիտասարդների ներգրավվածություն տեղական ինքնակառավարման գործընթացներում, համայնքի կարիքների և հնարավորությունների բացահայտում, գաղափարների ձևակերպում և գործողությունների պլանավորում, հանրային խոսք, ներկայացման հմտություններ ու սոցիալական մեդիայի արդյունավետ օգտագործում։

Վերապատրաստումից հետո 30 մասնակիցները կդառնան Աշտարակի երիտասարդ դեսպանների ցանցի անդամ։ Ցանցի շրջանակում կկազմակերպվեն պարբերական հանդիպումներ և քննարկումներ, որոնց ընթացքում երիտասարդները կբարձրաձայնեն իրենց հետաքրքրող հարցերը, կներկայացնեն գաղափարներ, կփոխանակվեն փորձով և կտեղեկանան կրթական, երիտասարդական ու կամավորական հնարավորությունների մասին։

Մասնակիցները հնարավորություն կունենան ներգրավվելու «Միավորող կամուրջ» և «Ոսկեհատ» հասարակական կազմակերպությունների, ինչպես նաև գործընկեր կառույցների ծրագրերում, միջոցառումներում և կամավորական նախաձեռնություններում։

Ծրագրի կարևոր բաղադրիչներից է նաև Ոսկեհատի Ներսես Ներսիսյանի անվան ճամբարը, որը նախատեսված է 6–18 տարեկան երեխաների և պատանիների համար։ Ճամբարի շրջանակում կիրականացվեն արվեստին և արհեստներին, ոչ ֆորմալ կրթությանը, մշակույթին, գիտությանը, սպորտին և շրջակա միջավայրին նվիրված կրթական ու ժամանցային միջոցառումներ։

Երիտասարդ դեսպանների ցանցի ցանկացող անդամները կկարողանան կամավորական հիմունքներով ներգրավվել ճամբարի աշխատանքներում՝ աջակցելով խմբերի համակարգմանը, խաղերի ու կրթական գործողությունների կազմակերպմանը և ճամբարի ընդհանուր ընթացքին։ Այս փորձը նրանց հնարավորություն կտա գործնականում զարգացնել առաջնորդության, թիմային աշխատանքի, հաղորդակցության և երեխաների հետ աշխատանքի հմտությունները։

Ցանցի անդամներից չի ակնկալվում պարտադիր կերպով սեփական համայնքային ծրագիր իրականացնել, և անհատական նախաձեռնությունների համար առանձին ֆինանսավորում նախատեսված չէ։ Միաժամանակ, սեփական գաղափարներն ու նախաձեռնությունները զարգացնել ցանկացող երիտասարդները կստանան խորհրդատվական, մենթորական, տեղեկատվական և կազմակերպչական աջակցություն։

Ծրագրի եզրափակիչ փուլում՝ 2026 թվականի նոյեմբերին, կանցկացվի Աշտարակ համայնքի երիտասարդական համաժողով։ Համաժողովը հնարավորություն կտա ներկայացնելու ծրագրի արդյունքները, քննարկելու համայնքի երիտասարդների առաջնահերթությունները, ցանցի հետագա գործունեությունն ու համագործակցության հնարավորությունները։ Հանդիպման ընթացքում կքննարկվի նաև Աշտարակ համայնքում երիտասարդական խորհրդի ձևավորման գաղափարը։

Ծրագրի ավարտից հետո երիտասարդ դեսպանների ցանցը կշարունակի գործել՝ ապահովելով պարբերական հանդիպումներ, տեղեկատվության ու հնարավորությունների փոխանակում և երիտասարդների ներգրավում հետագա ծրագրերում ու կամավորական աշխատանքներում։

Ծրագիրն իրականացվում է «Միավորող կամուրջ» սոցիալական հասարակական կազմակերպության և «Ոսկեհատ» երիտասարդական հասարակական կազմակերպության կողմից՝ Աշտարակի համայնքապետարանի ֆինանսավորմամբ։